Sayembara
Ngangkat Gandhewa
Prabu
Dasaratha, raja Ayodya duwe bojo prameswari aran Dewi Kosalya (Sukasalya) lan bojo
selir aran Dewi Kekayi uga Dewi Sumitra. Saka Dewi Kosalya peputra Raden
Ramawijaya, saka Dewi Kaikeyi peputra Bharata, lan saka Dewi Sumitra peputra
kembar aran Laksmana lan Satrughna. Ing sawijine dina, ana resi sing jejuluk
Rsi Wismamitra njaluk tulung karo Raden Ramawijaya supaya mbebasake pertapane
saka para raksesa. Ramawijaya didherekake Laksmana banjur mangkat. Ing pertapan
iku, Rama lan Laksmana kasil mateni kabeh raksesa. Awit saka wejangane Rsi
Wiswamitra, Rama lan Laksmana tumuju nagara Mithila (Manthili) saperlu melu
sayembara ngangkat gandhewa kang dianakake raja Janaka. Sapa kang menang bakal
dadi sisihane putri raja Janaka, Dewi Sinta.
` Sayembara dina iku kawiwitan ananging mung sedhela
amarga mung sethithik sing ngleboni sayembara iku. Raja Janaka ora tentrem
penggalihe amarga para satriya durung ana sing kuwasa ngangkat gandhewa. Lagi
wae raja Janaka arep ndhawuhake bubare pasewakan, katungka sowane sinatriya
Ramawijaya lan Laksmana sing bakal ngleboni sayembara. Akeh para raja sinatriya
sing rumangsa luwih gagah gedhe dhuwur padha ngguyu neng batin ngira yen
Ramawijaya ora bisa mugkasi gawe. Beda karo penggalihe raja Janaka kang wis
bisa nitik yen Ramawijaya kuwi satriya pinunjul kang bakal bisa mupu sayembara.
Sawise raja Janaka paring palilah, Ramawijaya
tumuju ing panggonane gandhewa. Ramawijaya banjur atur sembah marang raja
Janaka kang lenggah ing panggungan jejer karo putrine Dewi Sinta. Nalika iku,
nadyan mung saklebatan tempuking paningal Ramawijaya klawan Dewi Sinta gawe
getering ati sing ora kena dilirwakake.
Sawise Ramawijaya nyembah marang raja Janaka, kanthi pangati-ati banjur
ngangkat gandhewa. Ramawijaya kasil ngangkat gandhewa, awit saka iku Ramawijaya
didhaupake karo Dewi Sinta. Dewi Sinta diboyong neng Ayodya karo Ramawijaya lan Laksmana.
Tidak ada komentar:
Posting Komentar