Kebudayaan_Panatacara Adicara Pawiwahan

PANATACARA MIWITI ADICARA PAWIWAHAN

Mahardikeng tyas ring kamardikan nugraha miwah sih wilasanipun Gusti ingkang Maha Agung. Mugi anggung sumandha wonten ing jiwangga kita sawegung waradin sagung dumadi, raharja, niskala, satuhu. Mligi tumrap para rawuh ingkang angrasuk agami Islam.

Assalamualaikum Wr. Wb.

   Para sesepuh myang pinisepuh ingkang pantes sinungkeman, para sanak kadang sentanawarga pamong mitra ingkang tansah sinambrama ing pamboja, para rumaja putra rumaja putri ingkang tansah kinasih ing Gusti, waradinipun dhumateng sangyaning para rawuh kakung putri wreda mudha minulya.

   Sagah kajibah mingkuh katempuh, mestuti dhawuhipun pamangku gati nun inggih bapak Yongki sekaliyan keparenga kula pun Nadia marak ing ngarsa panjenengan awit ing titiwanci punika kula kadhawuhan mranatacara wonten ing pawiwahan dhaupipun Nimas Ayu Kumala Sari putrinipun bapak Yongki sekaliyan, kaliyan dhimas bagus Husni Nugroho priyatmajanipun bapak Taat sekaliyan ingkang saking Brebes.

   Para rawuh kakung putri wreda mudha minulya. Burat padha tresning putra, sisa brama welut wisa. Hambok bilih wonten lumunturing sih. Mugi keparenga kula angaturaken reroncen lampah-lampahanipun tatacara pawiwahan ing siyang punika ingkang asasana ing Desa Sukamaju, Salatiga amarengi hari Jumat surya kaping 3 warsa 2014 Masehi.

   Menggah reroncening tatacara pawiwahan ing siyang menika nuninggih.

1.      Sepisan pambuka utawi purwaka

2.      Ingkang angka kalih, praptanipun calon penganten priya ing sasana hargya tumunten kalajengaken pasrah panampining pengantin priya. Pasrah pengantin priya badhe mangke badhe katindakaken dening ibu Isna Maroh, dene panampi mangke badhe katindakaken dening ibu Three Sussanthy.

3.      Purnaning pasrah panampi penganten priya tumunten badhe kadhaupaken nut tatacara adat Jawi tilaranipun para leluhur linuhung Jawi.

4.      Panggihing pengantin ing mangke badhe keregengaken dening ibu Nikmah Sholikhah saking sanggar rias Sulistya ing Warni kalebet tatacara candakipun ngantos sungkeman utawi ngabekten sedaya mangke badhe kapratitisaken dening rising juru paes.

5.      Tatcara candakipun atur pambagyaharya saking pamangkugati sekaliyan ingkang badhe katindakaken dening bapak Wimar Aditya.

6.      Sakaparipuraning pambagyaharja, para rawuh kepareng paring pudyasta warja, pudyastuti dhumateng pengantin kekalih minggahipun ingkang sami mangun bebesanan kanthi ajawat asta.

7.      Saksampunipun paring pangestu kanthi ajawat asta, para rawuh ingaturan tumuju ing sasana bujana saperlu mundhut unjukan sarta dhaharan ing kang kasamaptakaken dening para kadang biyantu ing reh bujana nuninggih para kadang saking Barokah Catering. Mekaten kalawau reroncen lampahing tatacara pawiwahan ing siyang punika. Ing salajengipun sinambi nengga tumapaking adicara saha tatacara sumangga panjenengan sedaya kula dherekaken hanyekecakaken lenggah sinambi mangun oneng mangun rarasruming driya utawi kangen-kangenan. Sumangga nuwun.

NUTUP ADICARA PAWIWAHAN

   Para rawuh ingkang dhaht kinurmatan setunggal baka setunggal lampahing tatacara pawiwahan ing siyang menika sampun katindakaken kanthi raharja. Wahyaning mangsa kala wus ndungkap titipurnaning pawiwahan. Wonten ing sungapaning pawiwahan kula pun Wisnu Pratama ingkang piniji pinitaya minangka panatacara hambok bilih anggen kula angayahi jejibahan wonten galap gangsuling atur kiranging subasita myang tatakrami kula nyuwun lumunturing sih samudra gung pangaksami.