Pendidikan_Wacan Prosedural

Wacan Prosedural

Sega gandhul kang paling kawentar yaiku sega gandhul saka kutha Pati. Panganan khas Pati iki diarani sega gandhul awit sega lan sayure kuwi ora langsung tumemplek ing piring ananging piringe dilambari godhong gedhang, dadine sega lan sayure gandhul-gandhul ing dhuwur godhong gedhang. 

Sega Gandhul Pati

Bahan-bahan:

-       daging sapi 350 gram (diris-iris wangun dhadhu 3cm)

-       santen klapa (kenthel) 250 ml

-       godhong salam 1 lembar

-       godhong jeruk wangi 2 lembar

-       cengkeh 2 iji

-       kayu manis 1/8 sendhok teh

-       pala bubuk 1/8 sendhok teh

Bumbu kang diuleg:

-       lombok abang 2 iji

-       brambang 5 siung

-       bawang 3 siung

-       kemiri 3 iji

-       tumbar 2 sendhok teh

-       kluwak 2 iji

-       merica 1 sendhok teh

-       jae 1 keret

-       laos 2 keret

-       kunir ½ keret

-       lenga goreng 3 sendhok mangan

-       uyah

-       gula

Carane gawe:

-      Lenga goreng  disok ing wajan kang wis panas, bumbu kang wis diuleg, kayu manis, cengkeh, pala, godhong salam, lan godhong jeruk ditumis nganti mateng lan ambune sedhep. Banjur daging sapi dilebokake ing wajan lan diudhek-udhek nganti kaku.

-    Wenehana banyu kira-kira 700 ml, terusake anggone nggodhog nganti daginge empuk, nanging aja nganti kasaten. Nalika banyune kira-kira isih 500 ml, tambahana santen kenthel bnajur udhek lan entenana nganti umub.

-  Nalika umub kuwi pratandha yen wis mateng. Banjur kuah gandhul diwadhahi mangkok, nyepakake piring kang wus dilambari godhong gedhang. Sawise kuwi, piring kang wus dilambari godhong gedhang mau diiseni sega, gandhul, kecap manis, lombok uleg alus, empal daging utawa jeroan, tempe goreng lan bergedel.

-     Unjukane bisa teh anget, wedang jeruk, utawa es jeruk. Hmmmmm enak tenan. Sega gandhul Pati pancen ora ana tandhingane. Yen jarene Pak Bondan, Mak Nyus!